Lo Congrès prepausa ara tres novèls diccionaris e una novèla seccion dins son dicod'Òc, lo diccionari occitan.
Las seccions francés-occitan e occitan-francés se son enriquidas de las entradas de La Palanqueta, lo diccionari d'André Lagarde, que prepausa mai de 10 000 mots dins cada sens.
Lo dicod'Òc ven tanben d'èstre enriquit d'una novèla seccion occitan-occitan, que contendrà de diccionaris monolingües occitans. Prepausa pel moment un primièr obratge, lo Diccionari general occitan de Cantalausa. Aqueste conten de centenats de milierats de definicions o sinonims, 12 000 exemples de lenga parlada, numerosas expressions tipicas, l'etimologia dels tèrmes scientifics.... Es a títol provisòri que metem aquela edicion, una novèla edicion actualizada es en preparacion a partir, mai que mai, del trabalh de Miquèl Joffre.
Enfin, trobaretz ara dins la seccion « Diccionaris istorics » lo Dictionnaire béarnais ancien et moderne de V. Lespy e P. Raymond, una òbra màger dins l'istòria de la lingüistica occitana en Bearn e Gasconha.
Lo Congrès merceja los autors e los editors de li permetre de metre en linha aquelas òbras.