Lo Conselh lingüistic del Congrès s'amassèt lo dissabte 15 d'octobre a l'Ostal d'Occitània a Tolosa. A integrat un sòci mai - Francés Coutray - e alargat son burèu amb Cecila Chapduelh e Rafèu Sichèl.
L'amassada faguèt l'analisi dels trabalhs realizats o en cors dont primièr l'adaptacion dels mots sabents a l'occitan (una lista de las formas aprovadas serà establida). Per çò que pertòca lo Vocabulari d'istòria e de geografia, se prepausèt de melhoraments dins la mira de metre en linha l'obratge abans la fin de l'annada. Lo Diccionari de l'analisi literària de Francés Coutray deuriá tanben èstre publicat sul site del Congrès pro lèu.
Una comission terminologica serà mesa en plaça per poder desvolopar una metodologia clara de trabalh. Serà completada per de comissions especificas que poiràn recampar a l'encòp de lingüistas e d'especialistas de las disciplinas tractadas.
S'organizèt tanben lo trabalh sul futur Diccionari general de la lenga occitana. Una plataforma de trabalh collaborativa serà mesa en linha per completar la version provisòria de l'obratge.
L'amassada faguèt lo bilanç de la cronica Punt de Lenga, realizada en partenariat amb La Setmana, qu'es plan consultada sul site del Congrès. D'ara enlà, dos novèls conselhièrs participaràn a son elaboracion.
Lo Conselh lingüistic respondèt enfin a una partida de las questions del Conselh dels usatgièrs e a previst l'estudi de las autras questions a tractar.