Los primièrs rencontres de Salinèla : literatura e creacion d’Òc actuala se debanaràn los 15 e 16 de junh dins lo vilatjòt de Salinèla, prèp de Someire (Gard).
Aculhit per la comuna dins la sèrra e lo parc del castèl, aquel eveniment que s’inscriurà dins la durada serà un moment d’escambi e de descobèrta a l’entorn de la literatura en lenga d’Òc, dins una perspectiva obèrta e viva. Farà lo ligam entre los tèxtes grands de la tradicion literària d’Òc e la creacion contemporanèa mai recenta, en prepausant un agach englobant tot l’espaci de la lenga d’Òc dins sa diversitat.
Ongan, es la poesia que serà al centre de la programacion, en tot fasent plaça a d’autras formas d’expression (contes pels mainatges, cançon, fòto…), per crear un espaci de rencontre e de convivéncia.
Al programa : lecturas mesas en votz e en musica per far ressonar la paraula d’Òc al delà del libre, conferéncias per far descobrir los tèxtes grands, debats, exposicion fotografica, salon d’editors, espaci mainatges, concors d’escritura pels mainatges e jovents.
Lo projècte, sostengut per la Region Occitània e lo Cirdòc, a pasmens besonh d’afermir son finançament. Lo Comitat de las Fèstas lança donc una crida als que volrián participar per lor sosten a l’espelida d’aquel eveniment !