En aquera tempora de vacanças l’equipa deu Congrès que contunha totun - dab tanben un repaus plan ameritat - de s’i har !
Que’ns podetz retrobar a l’Estivada a Sebazac, on Aura Séguier, cap de pòle informatic deu Congrès, qui participarà au fòrum Territòris numerics lo 26 de julhet e tanben aus Rescontres occitans deu CFPÒC Montanhòl a Sant Bonet de Riom, on Isabèla Collomb, toponimista, animarà un conferéncia e un talhèr a l’entorn de la toponimia occitana deu parçan lo 30 de julhet.
Que contunha lo programa europèu LINGUATEC-IA : que son dejà en plaça las sòlas tà crear un navèth lexic occitan-catalan qui serà a tèrmi integrat en lo traductor automatic Revirada e pertocant la reconeishença vocau que seràn tractadas las duas votz navèras (fonetizacion deu còrpus) enregistradas en genèr. Tostemps tà Revirada, entà respóner a besonhs especifics deus usatgèrs qu’èm a crear un version avançada tà que’s poscan causir “trèits” de lenga com fait/fach o lo-la/le-la/eth-era. Enfin lo laboratòri CLLE (universitat de Tolosa-CNRS) e lo Congrès qu’aprèstan l’organizacion lo 6 e 7 de noveme a Tolosa d’un seminari transfronterèr dedicat a las tecnologias de las lengas deus Pirenèus, que i seràn presentats los darrèrs tèsts de la sintèsi vocau occitana, qui artenh ua qualitat de 90% !
En aliança dab l’INRIA (Institut national de recherche en sciences et technologies du numérique) lo Congrès qu’a entinoat un programa de creacion d’un transcriptor automatica de grafias. Atau que’s poderàn connectar ressorsas en grafias mistralenca e febusiana aus utís deu Congrès, e qu’esperam abastar mercés a tecnologias en intelligéncia artificiau.
Qu’avem la bêta de la navèra version de l’aplicacion mobila vèrbòc : qu’ei beròi actualizada, qu’ei mei ludica dab jòcs tà trobar lo temps, la persona, l’anagrama, los vèrbes alternants, etc. Qu’èm a aprèstar la fasa de tèst, qu’auratz arron l’aplicacion en las botigas Google Play e App store.
Enfin tà çò deu programa CPER, qu’èm a ahortir l’equipa deu DGILO (Diccionari generau informatizat de la lenga occitana) dab navèths lexicografes. Tà çò de la toponimia, que contunha la collècta de las ressorsas existentas e lo tribalh de restauracion en Navèra-Aquitània, Occitània e Auvèrnhe-Ròse-Aups, lo Congrès e l’IGN que son a aprestar lo renovelament de convencion-quadre e l’equipa que comença de pensar au futur portau dedicat a la toponimia, dab mapas integradas, basa toponimica, notícias, bibliografia, etc.
Obradors deus beròis qui espeliràn aquestes mes qui vienen, en l’espèra que’vs desiram a totas e a tots un bon estiu, dinc a la rentrada !
L’equipa deu Congrès