IEO Edicions a publicat en junh passat dos recuèlhs de novèlas en occitan : Limitas de Bernat Bergé, Joan Bodon e Joan Claudi Sèrras e De cada jorn de Bernat Bergé, Joan Escafit, Joan Claudi Sèrras e Florian Vernet.
Limitas parla de personatges enfangats dins una vida previsibla fins al desespèr, acarats a una realitat que los despassarà lèu. L'ascensor del burèu nos mena d'un còp dins una autra vida, los orses de la tapissariá, a costat del lèit, desapareisson un ser… Lo libre es illustrat per Bernat Cauhapè.
De cada jorn es mai destinat als jovents. Met en scèna de personatges vertadièrs, marcats per la vida, dels sentiments bruts, sensibles. De matèria per dintrar dins un univèrs ont l'Òme a la plaça que li balham, e que lucha per existir. Entre Marina e Clamenç, visitam dos univèrses encrosilhats, paradòxa d'un país occitan ont se costejan banlèga besierenca e pregondor dels campèstres. Un país ont çaquelà l’errància es pas pròpria ni dels uns ni dels autres, ont se mescla pr’aquò a l’espèr coma l’èrba que buta al mitan del beton.