Ne manquetz pas Lo Passat recompausat, lo solet espectacle istoric multilingüe ! Lo Congrès qu’ei hèra urós d’aver tribalhat dab l’associacion Mosaïque tà realizar l’arrevirada gascona de l’espectacle.
Que s’ageish d’un espectacle istoric, qui’s basa sus hèitas realas, qui hè pujar sus l’empont 112 benevòles, ua cavaleria professionau e tanben mèstes fauconèrs. Dab mei de 500 costumes d’epòca, que conta l’istòria de Bidaishe de 1266 a 1856.
Entà ua immersion sancèra, l’espectacle qu’ei difusat de faiçon simultanèa en occitan e en basco (dab reservacion) en mei deu francés, e arreviradas escriutas en espanhòu e en anglés que son tanben disponiblas.
La presidenta de l’associacion que conta atau la naishença deu projècte :
« Tot que comencè per ua conversacion fortuita dab la principala deu collègi deu País de Bidaishe, a l’escadença d’ua ceremonia collaborativa. Lavetz que descobrim que lo noste establiment èra lo solet en França qui prepausava l’opcion dobla “Occitan” e “Basco”. Aquesta revelacion que vadó lo punt de despart d’ua aventura extraordinària : la creacion deu solet espectacle istoric presentat dens aquestas duas lengas regionaus.
Tres ans qu’estón necesaris enta concretizar aqueth projècte ambiciós. Tres annadas de recèrca, de preparacion e de collaboracion entà tiéner tot los desfís qui’s presentèn. »
Entà realizar aqueth projècte, l’associacion que podó participar a las cridas a projèctes ELKI e De cap tau monde de la CAPB, a favor de las iniciativas per las lengas regionaus.
L’espectacle que’s harà au Castèth de Gramont a Bidaishe (64), los : 31/07, 01/08, 02/08, 03/08, 07/08, 08/08, 09/08, 10/08 a 21 h 20.