Lo divés 22 d’octobre passat que’s tienó a Baiona un collòqui organizat per Euskal Konfederazioa e Euskaltzaindia - Academia de la lenga asca, en partenariat dab la mairetat de Baiona, titolat : Lei tà çò de la proteccion e la promocion deu patrimòni lingüistic. Quinas perspectivas ?
Lo canau de television Kanaldude que retransmetó en dirècte totas las taulas redondas e totas las intervencions qui dèn lo torn deus aspèctes concrets de la situacion actuau de la lei Molac.
En un purmèr temps, qu’avièn lo collòqui Jean René Etchegaray, maire de Baiona e president la Comunautat d’aglomeracion País Basco, Andres Urrutia, president de l’Academia de la lenga basca, Antton Curutcharry, president de l’Ofici public de la lenga basca, e Luxi Detchart, sòcia deu conselh d’administracion d’Euskal Konfederazioa.
Que clavèn la matiada las intervencions deu quite Paul Molac, raportaire de la lei, e d’Eneritz Zabaleta, doctor en dret, entà establir un estat deus lòcs arron la censura deus dus articles au mes de mai passat.
Lo vrèspe, qu’estón duas taulas redondas deus actors deu terrenh qui detalhèn mei concrètament quin se debanava dens los lors domènis respectius, dab :
- Lo punt de vista deus elejuts, dab Max Brisson, senator, Mathieu Bergé, conselhèr regionau de Navèra Aquitània e Antton Curutcharry, president de l’Ofici public de la lenga basca.
- Lo punt de vista de las academias de lenga, dab Sèrgi Javaloyès en representacion deu Congrès permanent de la lenga occitana, Visant Roue per l’Ofici public de la lenga bretona, Joan Peytaví i Deixona, sòci de l'Institut d'Estudis Catalans e Jakes Sarraillet, academician correspondant de l’academia de la lenga basca.
Que’s clavè la jornada dab las conclusions deu collòqui presentadas peus organizators, dab Luxi Detchart per Euskal Konfederazioa e Sagrario Aleman per Euskaltzaindia. Los escambis qu’estón deus rics e las intervencions de las qualitativas entà enriquir la reflexion tà çò de la transmission de las lengas minorizadas : los elements aportats tot au long de la jornada qu’an lo meriti de har progressar lo debat sus la lei dab arguments de hons.