« Legissi, escrivi. Aprene a legir e a escriure - Occitan » es un libròt d'aprendissatge de la lectura e de l'escritura en occitan, fargat per Florent Daubin, professor de las escòlas e mèstre formator. En cors d'estampatge, l'obratge poirà èsser comandat en librariá (distribucion SODIS) a partir de la debuta de junh de 2019.
Aquel libròt permetrà als escolans escolarizats dins las seccions bilinguas a paritat orària francés-occitan de las escòlas publicas e de las escòlas bilinguas immersivas Calandretas de bastir lors competéncias de lector-escriptor en occitan.
« Legissi, escrivi » foguèt elaborat sul modèl del manual « Je lis, j'écris. Un apprentissage culturel et moderne de la lecture - CP » e poirà èsser emplegat en complement d'aquel manual.
Cada jorn, l'escolan bilingüe legirà de sillabas, de mots, de frasas e de tèxtes pichons en occitan.
L'entrada grafemica e la progression fidèla a la de « Je lis, j'écris » permetràn a l'escolan de far de ligams, de ponts, de comparar lo francés e l'occitan.
Las frasas de legir son sovent extrachas de poesias, de cançons, de comptinas mas tanben de provèrbis eissits de la tradicion orala occitana.
Per cada leiçon, d'exercicis ritualizats, aisits a comprene e de bon realizar en autonomia son prepausats a l'escolan. Li permetràn de trabalhar lo deschifratge, l'encodatge, l'enriquesiment del lexic mas tanben la compreneson.
En fin de libròt, los provèrbis legits son explicats e d'activitats suplementàrias permetràn a l'ensenhaire de diferenciar aisidament sa pedagogia.
L'obratge pòt èsser comandat dins cada librariá (distribucion Sodis). Crompat a l'unitat, son prètz es de 6,50 €.