Lo Congrès permanent de la lenga occitana a enregat un programa de creacion de plataforma lexicala, textuala e toponimica dins l'encastre del Contracte de plan d'Estat-Region novèl (CPER).
S’agís d’un esplech innovant e interactiu d'accès unic a l'ensemble de las donadas lingüisticas (diccionaris, gramatica, fonologia, còrpus textuals, toponimia, etc.), sa creacion comprendrà :
- la redaccion del Diccionari general informatizat de la lenga occitana ;
- un plan de restauracion toponimica en associacion amb l'IGN (dont lo Congrès es d’ara enlà lo referent per la restauracion de las formas occitanas).
- un programa dedicat a la constitucion massisa de ressorsas TAL (Tractament automatic de las lengas) amb lo formatage e l'anotacion dels còrpus lexicografics e textuals.
Amb lo sostien las regions Auvèrnhe-Ròse-Alps, Novèla Aquitània e Occitània, aital coma de l'Estat (ministèri de la Cultura, DRAC Novèla Aquitània e Occitània), aquel programa pluriannal (2024-2027) permetrà lo desvolopament d'una infrastructura numerica d'excelléncia.
Lo Diccionari general de la lenga occitana es una òbra academica de prestigi indispensabla a la coneissença e a la difusion de la lenga. En efièch, dempuèi lo Tresor dóu Felibrige de Frederic Mistral, cap d'òbra lexicografica panoccitana d'aquel nivèl scientific e d'aquela dimension es pas estada producha fins ara. Se parla donc d'un obrador istoric mobilizant l'ensemble de las coneissenças, de las ressorsas e de las competéncias scientificas e tecnicas en lenga d'òc. Per aquó far lo Congrès permanent de la lenga occitana recruta lexicografes.
De formacion superiora, mestrejatz l'occitan dins una o mantuna varietat (la mestresa d'una autra lenga latina es un mai) ? Sètz passionat(da) per la lenga e avètz una coneissença avançada de son còrpus escrich e oral aital coma una curiositat permanenta a ne descobrir tota la riquesa ? Rejonhètz una equipa dinamica, dins una ret scientifica e tecnologica europèa, e desvolopant d'aplicacions de poncha per la lenga occitana.
Per ne saber mai sus la descripcion del pòste, las condicions d'aqueste e per candidatar fins al 23 d'octobre, volgatz legir l'ofèrta :