Lo Congrès permanent de la lenga occitana que vien de méter en linha la version navèra deu son site institucionau, locongres.org.
Aqueth cambiament qu'ei ua estapa importanta dens la reorganizacion actuau deus nostes servicis numerics : vertat, lo Congrès qu’a hèra pravat dempuish la prumèra mesa en linha deu noste site en 2012, e la soa arquitectura n’èra pas mei autant adaptada a mesura qu'editàvam ressorsas navèras, dinc a’n pèrder en lisibilitat.
Com los nostes usatgèrs ac an podut remarcar, qu'avem donc realizat per aqueras annadas passadas un redesplegament complet deus nostes portaus en los hant autonòmes cap au site institucionau : Dicodòc (diccionaris, conjugador, còrpus textuau), Revirada (traductor), Votz (sintèsi vocau), mes tanben los portaus Lenga & Societat, Pedagogia o enqüèra API entaus desvolopaires, qu'an d'ara enlà sites dedicats.
Dab aquera version navèra locongres.org que torna a çò de màger, estar lo site institucionau de l'organisme de regulacion de lenga occitana, on son presentats la nosta organizacion, las nostas competéncias, las nostas realizacions màgers, los obradors en cors atau com l'actualitat. Qu’avem metut l'accent suu contienut, qui ei enriquit per documentacion, dont las ressorsas lingüisticas de referéncia, e que serà mei regularament actualizat .
Lo site navèth qu'ei tanben pensat com un portau cap a l'ensemble de las nostas ressorsas, dab un accès optimizat per tipe de public e prepausant ua garba de servicis mei au ras deus besonhs, que sia entaus simples utilizators, professionaus de la lenga, ensenhaires o enqüèra agents de collectivitats .
Enfin qu'avem volut tanben hà’s en ligam mei dirècte dab los nostes usatgèrs qui an d'ara enlà un punt d'accès entà ns'ajudar : versament de còrpus, don de votz o, entaus mei generós, possibilitat de sostiéner financèrament lo desvolopament de las nostas aplicacions e la lor disponibilitat gratuita tà tots.
N’ei pas acabat l’obrador totun, dab las sortidas a viéner de la Farga numerica (portau dedicat a las tecnologias de la lenga), Tèrmòc (basa terminologica) e Lexicografia (interfàcia de consulta avançada de las dadas lexicaus e textuaus).
En esperant que'vs desiram ua bona visita sus locongres.org !