Lo 30 de junh passat lo CIRDÒC organizava, en partenariat amb los laboratòris CLLE-ERSS e RedÒc-LLACS, una jornada professionala sul tèma del tractament informatic dels còrpus textuals dins sos locals a Besièrs.
En occitan al jorn d'uèi, los projèctes d'espleitacion de las sorsas escrichas se multiplican e produsisson basas textualas, edicions electronicas, diccionaris en linha e autres otisses e ressorsas numericas al servici dels cercaires e amators. Es per aquò que lo CIRDÒC, la còla BaTelÒc del laboratòri CLLE-ERSS (Universitat Tolosa – Joan Jaurés) e lo laboratòri RedÒc-LLACS (Universitat Paul Valèri, Montpelhièr) convidèron mantun actor a participar a una jornada d'estudi sus aquela tematica.
Lo Congrès i presentèt lo trabalh de formatatge en TEI de sas donadas e lo laboratòri CLLE-ERSS i parlèt de la basa textuala BaTelÒc, que ven d'èstre mesa en linha, e deu Loflòc. D'autres còrpus e projèctes aparentats i foguèron presentats : Ciel d'Òc, Le Petit Thalamus de Montpellier, Symila que Patric Sauzet, president del Conselh lingüistic del Congrès, n'es responsable d'un axe...
La jornada èra estada obèrta per Noémie Eyraud, doctoranta en occitan, que beneficia d'una borsa CIFRE per trabalhar al dintre del CIRDÒC sus l'edicion electronica de tèxtes literaris occitans escriches entre 1850 e 1914.
Aquela jornada foguèt l'escasença per cadun de se rescontrar, de far conéisser los otisses que son a se desvolopar, de partejar son expertesa o d'enriquir sa produccion mercé als conselhs e experiéncias d'autres actors.