Lo 26 de setembre passat, l'Escòla Latina de Pomaret (Piemont) aculhissiá un congrès consagrat als diccionaris e a las gramaticas de las valadas occitanas cisalpencas, dins l'encastre de la Jornada de las lengas minoritàrias. Lo Congrès permanent de la lenga occitana i èra convidat per presentar las evolucions del Dicodòc.
Las intervencions cobriguèron tota la cadena del trabalh sus la lenga. Aline Pons, professora a l'Universitat de Turin, retracèt lo passatge dels primièrs trabalhs de collectatge als diccionaris enciclopedics. Michele Tron presentèt las gramaticas e l'istòria de la gramaticografia dins las valadas cisalpencas. Andrea Celauro faguèt descobrir L'Aizounenc, diccionari etnolingüistic de l'occitan d'Aison (Val d'Estura).
Aqueles trabalhs descriptius mòstran la riquesa dels usatges de l'occitan dins las valadas de Piemont e la vitalitat de la recèrca que los documenta.
Amb Diccionaroc, il dizionario dei dizionari, Gianna Bianco e Arturo Viano, de la Chambra d'Òc, presentèron lo trabalh lexicografic normatiu menat per aquesta institucion. Lor biais vòl unificar los parlars cisalpencs sul plan lexical e ortografic (en grafia classica), per donar a l'occitan de las valadas una referéncia comuna sens n'escafar la diversitat de las varietats.
Aqueste principi rejonh dirèctament l'accion del Congrès e se tòrna trobar dins lo Dicodòc. Benaset Dazéas, director del Congrès, ne presentèt l'evolucion, del multidiccionari en linha cap a la futura plataforma lexicografica e textuala occitana, amb un trabalh important menat sus la formatacion de las donadas en TEI (Text Encoding Information). Aquesta plataforma a per vocacion de se dobrir a las ressorsas de tot l'espaci occitanofòn. Los trabalhs presentats a Pomaret mòstran tot çò que l'occitan cisalpenc i pòt aportar, e l'interès de far dialogar las aisinas d'un costat e de l'autre dels Aups.
Lo Congrès merceja l'Associazione Amici della Scuola Latina per l'organizacion e l'acuèlh d'aquesta jornada, e mai Aline Pons, professora a l'Universitat de Turin, per son invitacion e la qualitat dels escambis.