Lo XIVen Congrès de l'Associacion internacionala d'estudis occitans se tendrà del 11 al 16 de setembre de 2023 a l'universitat LMU de Munic.
L’occitan a l’encontre dels estudis romanics
Es lo segond còp qu'un congrès de l'AIEO se tendrà en Alemanha. Aprèp Aquisgran en 2008, es Munic qu'a l'onor de recebre los congressistas. Aquò incitèt los membres de l'AIEO a soscar sul ròtle que l'occitan – lenga, cultura, literatura – joguèt pel desvolopament de nòstras tradicions academicas. Friedrich Diez, dont la Gramatica de las lengas romanicas (1836-1844) marquèt la debuta de la romanistica scientifica en Alemanha, èra fascinat per la literatura dels trobadors. Son viatge a Jena per encontrar Johann Wolfgang von Goethe fa pròva de son idèa de retrobar dins los poèmas medievals çò que los idealistas alemands apelavan la « Weltliteratur ». Goethe li aviá aconselhat de consultar las òbras de François Raynouard, que, per d'autras rasons, èra aitant fascinat pels tèxtes medievals coma Diez. Supausar qu'a l'origina dels estudis romanics se pòt trobar la fascinacion de l'Autre e la volontat de descobrir l'Universal dins la diversitat istorica de las lengas, literaturas e culturas, sembla un ponch de partença convencent per aquel congrès.
Pr’amor es pas solament lo passat que pòt profechar d'aquel apròchi comparatista. Lo comparatisme permet tanben de comprene melhor perqué la diversitat lingüistica e, en consequéncia, culturala es un subjècte a l'encòp scientific e politic. L'AIEO convida donc totas e totes a soscar sus las tensions, mas tanben las possibilitats que son ligadas en comparason de l'Autre, a un apròchi scientific e intellectual per qual la diversitat fa partida integranta de nòstra experiéncia umana.
Coma a l'acostumat, lo tèma causit fa resson als interèsses de cercairas e cercaires que trabalhan dins de domenis plan diferents mas que partejan lo meteis interès per la lenga e la cultura occitanas. Las contribucions son las benvengudas dins los domenis tals coma :
- la literatura medievala,
- la literatura modèrna e contemporanèa,
- la lingüistica sincronica e diacronica,
- la sociolingüistica e la dialectologia,
- la didactica de las lengas,
- la musicologia,
- l'antropologia e la sociologia.
Cèrtas, d'autras contribucions poiràn èsser prepausadas dins la mesura ont relèvan d'un subjècte en ligam amb l'occitan, ais central e vertadièra clau de vòuta d'aquel congrès.