Deu 11 au 16 de seteme de 2023, a l’Institut de filologia romanica de la Ludwig-Maximilians-Universität (LMU) de Munic.
Qu'ei lo dusau còp qu’un congrès de l'A.I.E.O. e's tienerà en Alemanha. Après Ais d'Alemanha en 2008, qu'ei Munic qui a l'aunor de recéber los congressistas. Aquò que’us a incitats a soscar suu ròtle qui l'occitan – lenga, cultura, literatura – a jogat entau desvolopament de las nostas tradicions academicas. Friedrich Diez, dont la Grammaire des langues romanes (1836-1844) a marcat la debuta de la romanistica scientifica en Alemanha, qu'èra fascinat per la literatura deus trobadors. Lo son viatge a Jena entà encontrar Johann Wolfgang von Goethe que hè pròva de la soa idèa de retrobar dens los poèmas medievaus çò qui los idealistas alemands aperavan la « Weltliteratur ». Goethe que l'avèva aconselhat de consultar las òbras de François Raynouard, qui, pr'amor d'autas rasons, èra autant fascinat peus tèxtes medievaus com Diez. N'entraram pas dens los detalhs de çò qui resultè d'aqueth encontre enter istòria literària e filologia, quitament lingüistica. Totun, supausar que's pòt trobar la fascinacion de l'Aute e la volontat de descobrir l'Universau dens la diversitat istorica de las lengas, literaturas e culturas com origina de las nostas disciplinas, que'us sembla un punt de partença convencent entau congrès.
Pr'amor que i a mei que lo passat qui pòt profieitar d’aqueth apròchi comparatista. Lo comparatisme que permet tanben de compréner miélher perqué la diversitat lingüistica e, en consequéncia, culturau, ei un subjècte au còp scientific e politic. Que convidan donc totas e tots a soscar sus las tensions, mes tanben las possibilitats qui son ligadas au par de l'Aute, a un apròchi scientific e intellectuau peu quau la diversitat e hè partida integranta de la nosta experiéncia umana.
Com a l'acostumat, lo tèma causit que hè resson aus interès de cercairas e cercaires qui tribalhan dens maines plan diferents mes qui partatjan lo medish interès entà la lenga e la cultura occitanas. Qu'ètz donc convidadas e convidats a prepausar contribucions qui vienen de maines taus com :
- la literatura medievau.
- la literatura modèrna e contemporanèa.
- la lingüistica sincronica e diacronica.
- la sociolingüistica e la dialectologia.
- la didactica de las lengas.
- la musicologia.
- l'antropologia e la sociologia.
Cèrtas, d’autas contribucions que poiràn estar prepausadas per tant qui tracten d'un subjècte en ligam dab l'occitan, èish centrau e vertadèra clau de vòuta deu congrès.
Data limita entà l'enviada deus resumits de las proposicions de comunicacions : 16 de deceme de 2022.