<p style="text-align: justify;">Las edicions de l’Institut d’estudis occitans (IEO-IDECO) son aürosas de vos presentar aqueste omenatge a Robèrt Martí, granda figura de l’occitanisme contemporanèu, que nos daissèt en mai de 2021.</p>
<hr id="system-readmore" />
<p style="text-align: justify;">Aqueste libre pretend pas dire lo tot d’aquel personatge pauc comun. Cada contribucion vòl simplament parlar, a son biais, de l’òme, privat o public, e de son òbra. Testimoniatges o analisis, los tèxtes recampats ofrisson totes una vision particulara, personala e subjectiva, mas çaquelà, d’un escrit a l’autre, las constàncias son evidentas, que revèlan una persona una e multipla a l’encòp : l’amorós d’un país e d’una lenga, lo passionat de transmission, l’escrivan prigond, l’autor de cançons e d’articles, de pèças umoristicas, lo pedagògue eficaç e aimat, l’òme de l’uèlh esperitós, lo militant entosiasta e infatigable, l’intellectual cultivat e dreit, de l’engatjament sense ambigüitat, lo contaire sense pariu, lo timide que pòt auçar la votz e s’expausar quand o cal, l’amic fidèl… Al mond que contribuïguèron, aqueste omenatge s’impausèt coma una evidéncia, per dire l’astre e lo bonaür d’aver conegut En Robèrt Martí, e tot çò que li devèm. Manièra de li tornar un pauc de tot çò que nos donèt e nos dona encara.</p>
<p style="text-align: justify;">De fòtos e d’illustracions qualitadosas acompanhan los tèxtes signats de Claudi Alranq, Josep Arasa Ferrer, André At, Mirelha Braç, Joaquín Castillo Blanco, Bernat Cauhapè, Joan-Loís Cortial, Olivièr Daillut, Josiana Daunís-Martí, Joan-Claudi Forêt, Eric Fraj, Jacme Gaudàs, Roger Harvey, Sèrgi Javaloyès, Sèrgi Labatut, Florant Mercadièr, Danièl Rifà, Alan Roch, Estefe Ros, Joan-Claudi Sèrras, Claudi Sicre, Joan Thomàs, Muriel Vernières, Sèrgi Viaule, Joan Vilòta.</p>
<p style="text-align: justify;">La coordinacion del libre foguèt assegurada per Josiana Daunís-Martí e Eric Fraj.</p>
<p style="text-align: justify;">Lo prètz de la soscripcion pel libre es de 12 € (al lòc de 15 € pus tard, fòra soscripcion), despensas de mandadís inclusas. Lo libre serà enviat als soscriptors e a las soscriptrises tanlèu paregut.</p>
<ul class="tiera">
<li style="text-align: justify;"><a title="Site de las edicions IDECO" href="https://ideco-dif.com/ieo_edicions/terra_de_cocanha/robert_marti_l_obra_vida/index.html" target="_blank" rel="noopener noreferrer">Comandar l'obratge</a></li>
</ul>
Soscripcion al libre Robèrt Martí, l’òbra-vida
