Qui ei La Musnegra, qui vien de sortir un obratge a las edicions Reclams ?
« Encontre deus escrivans de Gasconha de 2024. Monthòrt en Shalòssa. Qu’ei la tresau edicion d’aqueras trobadas organizadas per l’equipa deus Reclams e peu CIRDOC. Qu’èm vienuts entà tribalhar sus la SF. Intervencion de Joan Thomas e escambis.
Que nse trobam lavetz, las escrivanas e escrivans presents, gahats per ua propausicion qui non demoràvam brica : escríver amassas. Pas escríver cadun, cadua, dens lo madeish lòc, nani, escríver collectivament un medish tèxte. Un tèxte de SF, puish qu’èra lo subjècte abordat. Un tèxte qui poderem presentar au parat deu concors literari organizat cada an peu Conselh Departamentau de las Hautas-Pirenèas sus la tematica deu Pic de Mieidia.
Estrambòrds, esitacions, hamis e retienudas. Qu’ei çò qui va implicar tà nosauts ? Quin cau lançar l’ahar ? Quin hè cadun de nosauts tà’s botar en escritura ? Ua idèa premèr ? Ua scenari mei lèu ? Cadun que’s pren un capítou e se poderà avançar la hèita… Que calerà ua vision globau, tornar léger l’ensemble, acceptar ua lenga literària comuna… Suu banc d’escríver las dravas que sautan l’ua au darrèr de l’auta. Qu’ei atau qui lo collectiu e vad.
Que serà quauques mes mei tard, lo pretzhèit acabat, qui’s pausarà la question d’un nom a’s balhar. L’idèa de tornar préner lo subernom de l’instrument d’escritura qui n’emplegam mei las uas ni los autes que ganha l’adesion : la pluma. La pluma trempada dens la tinta negra : la musnegra. Atau qu’ei vadut lo collectiu qui presenta augan lo son premèr roman Tempèsta d’enlà.
La Musnegra que’vs desira adara a tot.a.s ua lectura plasenta e agradiva. »
Joan-Loís Lavit (edicions Reclams)