Lo Lexic deu vocabulari gascon bazadés deu Jean Dartigolles que vien de sortir en ua edicion realizada per l’associacion L’Auseron.
DARTIGOLLES Jean, Lexique du vocabulaire gascon bazadais recueilli dans le Pays de Cernès. Budòs : Association L'Auseron, 2026, 245p.
« Jean Dartigolles (1926-2017) qu'èra un amorós de la lenga gascona . En mei de las òbras en istòria locau qui hasón la soa reputacion, que passè la soa vita a collectar tots los mots qui podèva enténer pendent las conversacions dab las gents deu son entorn.
Après lo son decès, que deishè un tribalh considerable : un lexic de 286 paginas, escrivut a man sus duas colomnas, qui regropa milierats de mots deu gascon emplegat dens aquera partida deu Bazadés situada a l'oèst de la vath deu Ciron.
Lo document que presenta shensque lo vocabulari usuau deu monde rurau (las atrunas, las practicas agricòlas o forestièras, …), qu'abòrda tanben expressions ligadas a registres mei abstrèits atau com las relacions familiaus, la religion, l'afectivitat, los lésers, …
Dens mei d’un cas, l'autor que horní frasas simplas qui permeten de precisar lo sens de cada mot e de determinar la faiçon de la quau ei emplegat. Mei d’un tèrme ne figura pas dens nat lexic gascon-francés existent.
Qu'ei donc au còp un element essenciau entà la conservacion de la riquessa lingüistica deu parlar locau e un apèr pedagogic màger. »