Queu manuau presenta la conjugason de l'occitan lemosin, la varianta de la lenga occitana parlada en Lemosin, dins la meitat nòrd de Perigòrd, dins la màger partida de Marcha e dins la partida orientala de la Charenta.
La prumiera partida de l'obratge balha las caracteristicas de chasque temps a chascun daus quatre gropes verbaus, illustradas per de nombrós exemples. La segonda partida desvelopa las formas conjugadas de 69 verbes « tipes » aus diferents mòdes, la màger part de quilhs verbes fugueren chausits per lor irregularitat o per lor variabilitat. L'obratge se conclutz per un index de pres de 400 autres verbes susceptibles de presentar d'unas dificultats de conjugason.
Queu manuau s'adreça d’en prumier a los que aprenen la lenga occitana dins sa varianta lemosina, que quel aprendissatge siá dins un quadre escolar o universitari o ben ‘tot que prengués la forma d'un cors o talhier de conversacion per adultes. Mas serà egalament utile aus locutors o aus autors a la cercha d'una forma verbala particulara, aus amorós de la lenga, e a totes los que an a còr de respectar sa grafia e sa morfologia.