Lo Diari especial joves #2 : renovelament de l'accion dins l'encastre de la Setmana de la premsa e dels mèdias a l'escòla.
Dins l’encastre de son plan d’accion Licèu per la lenga occitana, l’Ofici public de la lenga occitana renovèla ongan l’operacion Lo Diari : especial licean, un numèro fòra-seria que tracta de subjèctes que parlan als joves : serias, jòcs video, mangas…
Ongan, l’operacion es estada pensada per se poder inscriure dins l’encastre de la Setmana de la premsa e dels mèdias a l’Escòla - CLEMI del 27 de març al 1èr d’abril de 2023. En efièch, l’ensenhament de las lengas vivas e de l’occitan en particular, constituís tanben una oportunitat vertadièra d’abordar l’educacion als mèdias amb los escolans.
Un fòra-seria especial liceans
Lo Diari es un magazine bimestral cultural d’un quarantenat de paginas, tot en occitan. Es editat dempuèi 2008 per l’IEO Occitània Pirenèus Mediterranèa e seguit per una comunautat de mai de 2500 lectors sus tot lo territòri occitanofòne.
Aquel fòra-seria tracta de subjèctes precises que parlan als joves, coma los mangas o los jòcs video, las aplis, las serias de veire en streaming, la musica… Prepausa un esclairatge modèrne sus l’actualitat, tot en portant una atencion particulara a la creativitat e a la qualitat grafica dels contenguts.
Aqueste numèro especial, sostengut pel ministèri de la Cultura, lo ministèri de l’Educacion nacionala e las regions Novèla-Aquitània e Occitània es ofèrt a la dintrada a totes los escolans occitanistas de las doás regions dels 64 establiments que prepausan l’opcion occitan.
Es d’ara enlà a gratis e consultadís en linha, e se pòt legir, partejar, difusir...