Doas novetats literàrias en cò de Letras d'òc : L'aucelon de las sèt colors e Tres Palometas blancas.
L'aucelon de las sèt colors :
En seguida del famós recuèlh dels Contes de la calandreta, Andrieu Lagarda a recampats de contes o racontes tirats de la tradicion populara tant occitana coma europèa, dins una lenga aisida e qualitadosa.
Aicí, vos congostaretz de legir L’aucelon de las sèt colors que balha, plan solide, lo títol al libre, mas tanben las aventuras de las bèstias : lo lop, lo rainard, l’ors, lo grilh o lo leon…, o encara las de Poceta, de Ponheton, de Pometa redondeta, del gat Mistigrís, del rire panat, del Solelh e de la Luna e d’autres encara…
Un libre dedicat als mainatges coma als parents.
Amb un lexic occitan-francés. Illustracion de S. Vissière
---
Tres Palometas blancas :
Andrieu Lagarda vos convida a caminar dins lo monde dels sieus contes meravilhoses, a la descobèrta de Tres palometas blancas.
Una òbra de granda qualitat literària que posa a la font dels contes populars occitans. I descobriretz las aventuras meravilhosas e misteriosas de Còs-sens-Anma, de la filha del rei e del soldat ajudat pel leon, l’agla e la formiga ; de l’òme de la barba blava e de las doas palombas ; de la vièlha nasicuda, mostachuda, caissaluda e tòrta, del filh del rei e de las tres pomas d’irange.
D’una votz clara, precisa e calorosa, Maria Odila Dumeaux dona vida als tres contes :
• Còs-sens-Anma,
• Las doas palometas,
• Las tres pomas d’irange