Patrice Poujade prepausa una edicion novèla de son obratge Diccionari toponimic d'Arièja, publicat a las edicions IEO Arièja.
« Que significa lo nom de la comuna dins la quala abiti ? Qué pòt voler dire aquel nom de riu ? Perqué los meteisses noms son presents en de luòcs alunhats mentre que d'autres son tan localizats ? Totòm s'es un jorn pausat aquelas questions. Es a elas e a plan d'autras qu'aquel libre volriá portar d'elements de responsa e de reflexion.
Aquela edicion novèla, revista e corregida, ven completar la precedenta e permetrà a totes d'accedir a un obratge indispensable, per la coneissença de nòstre territòri. En efièch, existissiá pas de trabalh recent sus la toponimia de l'ensemble de las comunas d'Arièja comparabla als que son estats publicats per d'autres departaments de la region o de regions vesinas. Dins aquel obratge, l'autor a volgut metre a la disposicion dels legeires çò que se sap suls noms de las comunas e de qualques luòcdiches del departament, d'unes rius, montanhas e païses (Savartés, Òlmes, etc.). Ne sintetiza e discutís las ipotèsis etimologicas e, al lum d'aquò, prepausa una forma grafica occitana que pòsca, a l'encòp, tenir compte de l'istòria del nom del luòc e s'adaptar a la realitat locala. Aquel trabalh presenta tanben los enjòcs de la toponimia e los problèmas que pausa al cercaire o al simple amator. Completat per una lista de sorgas e per la bibliografia utilizadas aital coma per un glossari dels tèrmes lingüistics, constituís un vertadièr instrument de trabalh pel legeire. »
Patrice Poujade es Professor de las universitats, Istòria modèrna, Director-adjunt del CRHiSM, President de la comission pedagogica del departament d'istòria (UPVD), Responsabla del trajècte MEF del Mastèr istòria/istòria de l'art (UPVD), Membre del Conselh d'Administracion de l'Association des Journées Internationales d’Histoire de Flaran (dempuèi setembre de 2000), Membre del Conselh d'Administracion de la Fédération Historique de Midi-Pyrénées (dempuèi novembre de 2005), Membre del Consejo asesor de Ripacurtia, revista del Centre d'Estudis Ribagorçans/Centro d'Estudios Ribagorzanos (Benabarre, Aragon), Membre del Consell assessor internacional de Recerques (Premsas de l'Universitat de Valença), Membre del comitat de redaccion de Les Annales du Midi.
POUJADE Patrice, Dictionnaire toponymique de l’Ariège Noms de communes, lieux-dits, montagnes, rivières et pays. Pamiers : IEO Arièja, 2026 [2022], 584p.
https://www.helloasso.com/associations/ieo-arieja/boutiques/alman-oc-2022