1a session de trabalh pel Grop de recèrca-accion sus la didactica bilingua a l’escòla primària.
Los 22 e 23 de novembre passats, los membres del GRAF, lo Grop de recèrca-accion suls fondamentals (didactica bilingua francés-occitan a l’escòla primària) se retrobèron a Montalban per una primièra session de trabalh sus la didactica de las matematicas en occitan.
Lo seminari s’amodèt per doas conferéncias :
Las experiéncias de recèrcas collaborativas en didactica de las matematicas : bi-plurilingüisme, ressorsas per la classa e geometria a l’escòla, per Caroline Poissard, Mèstra de conferéncias en didactica de las matematicas, Universitat de Brèst – UBO,
Qualques empaches didactics en matematicas : conceptualizacions e ressorsas contextualizadas, o cossí lengas e culturas regionalas pòdon influïr suls aprendissatges escolars e constituir de ressorsas pedagogicas, per Jean-Jacques SALONE, Mèstre de conferéncias en matematicas aplicadas e sciéncias de l’educacion, director de l’Institut de recèrca sus l’ensenhament de las matematicas, de l’informatica e de las sciéncias, Centre universitari de formacion e de recèrca de Maiòta.
Los 15 participants se despartiguèron puèi en grops de trabalh per analisar e montar de sequéncias d’ensenhament de la geometria en occitan.
Aquelas sequéncias seràn finalizadas e filmadas en classa per una mesa en comun al mes de març pendent una 2nda session de trabalh.
Los trabalhs seràn meses a la disposicion dels professors de las escòlas en classa bilingua sul site de l’Ofici public de la lenga occitana.