Lo 18 de junh passat, ua delegacion deu collectiu Pour Que Vivent Nos Langues (dont l’AELOC, la Confederacion Calandreta, lo Congrès permanent de la lenga occitana, la FELCO, lo Felibrige, Forum d’Oc, l’IEO e OcBi e’n son partprenents) qu'anè tà l'Elisèu entà reméter lo son aperet deu 18 de junh, a favor de la diversitat deu patrimòni lingüistic en França.
Aquesta iniciativa qu'ei activament sostienuda per 100 parlamentaris francés, pròva que la question deu sòrt reservat a las lengas regionaus qu'ei vertadèrament preocupanta per la representacion parlamentària. La remesa peu collectiu d'aquera letra au president de la Republica que s'inscriu tanben dens la perspectiva de la tribuna publicada dens lo quotidian Le Monde deu 13 de heurèr per 128 universitaris, alertant l'Estat sus la despareishuda programada de las lengas regionaus se n'i a pas nada reaccion immediata e ambiciosa en la lor favor.
Creat a la rentrada de 2019, lo Collectiu Pour Que Vivent Nos Langues que s'ei constituit en reaccion a las consequéncias lingüicidas de la refòrma deu licèu e deu bachelierat deu ministre Jean-Michel Blanquer, dont los efèits e son desastrós per la plaça de las lengas regionaus dens lo sistèma educatiu francés.
A l'iniciativa deu collectiu, ua manifestacion amassant un milierat d'ensenhaires, aprenents e pairs d'aprenents, responsables associatius, actors culturaus e politics que’s debanè devant los locaus deu ministèri de l’Educacion nacionau lo 30 de noveme passat a París.
Fàcia au refús de dialògue deu ministre de l’Educacion nacionau, lo collectiu qu’a decidit d’adreçà’s dirèctament au president de la Republica, en la perspectiva deus engatjaments pres quan la campanha de las eleccions presidenciaus. Aquera letra ubèrta que deu perméter de har vàder un dialògue dont la sortida ei un enjòc màger entà la societat francesa : l’aviéner de la diversitat deu son patrimòni culturau e lingüistic
Collectiu Pour Que Vivent Nos Langues
Tà’n saber mei :
- letra au president de la Republica deu collectiu Pour Que Vivent Nos Langues
- lista deus sòcis deu Collectiu Pour Que Vivent Nos Langues
- lista deus parlamentaris qui sostienen l’iniciativa deu collectiu Pour Que Vivent Nos Langues
- letra au ministre de l’Educacion nacionau Jean-Michel Blanquer deu 17 de genèr de 2020
- tribuna de 128 universitaris entà denonciar lo sòrt reservat a las lengas regionaus
- engatjaments de campanha e declaracions deu president de la Republica