L'Ofici public de la lenga occitana lança un ensemble d'esplèits pels elegits e pels tecnicians de las collectivitats localas per desvolopar de projèctes en ligam amb la lenga occitana.
Acompanhar las collectivitats
De mai en mai de collectivitats localas s’engatjan de cap al desvolopament de la lenga occitana : demanda de dobertura de cursus bilingües a l’escòla, sosten a las activitats associativas, formacion de personals a la lenga, valorizacion del patrimòni local, programacion d’artistas en lenga occitana, etc. Aquelas iniciativas, portadas per de comunas, intercomunalitats o departaments, se pòdon plan sovent far sens còstes suplementaris. Son fòrça encoratjadas, tant per la region Novèla Aquitània (qu’adoptèt una fuèlha de rota per las lengas regionalas en 2021) coma per la region Occitània (dins l’encastre de son plan Cultura Viva votat en 2022).
Una enquèsta realizada en 2020 metèt en evidéncia lo sosten fòrt dels abitants de las regions Novèla Aquitània e Occitània al refortiment de la preséncia de l’occitan dins lor quotidian.
Es per acompanhar aquelas dinamicas que l’Ofici public de la lenga occitana (OPLO), organisme public cargat de promòure la transmission e la visibilitat de la lenga occitana en Novèla Aquitània e Occitània, a elaborat un lòt especial collectivitats. Aquel lòt, concebut coma una caissa a esplèits, a per tòca de presentar l’ensemble de las possibilitats ofèrtas a las collectivitats per metre en òbra de projèctes a l’entorn de la lenga occitana.
Equipar los actors de terren
Concrètament, aquel lòt met en lum las diferentas oportunitats d’intervencion per l’elegit o los tecnicians de las collectivitats. Compren 12 fichas tematicas que presentan caduna los beneficis ligats al lançament d’un projècte, las modalitats, etapa per etapa, e identifica los còstes potencials. Per cada ficha, una pagina dedicada que compren tota una lista de ressorsas es en linha sul site de l’OPLO.
Per delà de l’acompanhament de las collectivitats, a l’objectiu d’equipar los actors de terren pendent lors interaccions amb aquelas. Compliment de 12 meses de concertacion, mobilizèt 9 partenaris : la region Novèla Aquitània e la region Occitània, lo CIRDÒC-Institut occitan de cultura, lo Congrès permanent de la lenga occitana, l’associacion Òc-Bi per l’ensenhament bilingüe a l’escòla publica, la confederacion de las Calandretas, l’Institut d’estudis occitans (IEO) e los dos Centres de formacion professionala en occitan (CFPO) de Besièrs e de Pau. De personas ressorsas son de mai identificadas per orientar las demandas d’acompanhament.
Testèron totes los contenguts al près d’elegits e de tecnicians de collectivitats.
Se desplegarà progressivament aquel lòt sus l’ensemble del territòri de las regions Novèla Aquitània e Occitània. Serà sustot utilizat pels servicis de l’OPLO e de sas tutèlas pendent los rencontres a venir, difusat al près dels partenaris associatius e mes a disposicion sus diferents punts de difusion del territòri.