Coma aplicar la lei sus la proteccion e la promocion de las lengas regionalas ?
Lo 5 de julhet que ven l’Ostal de Region Occitania a Tolosa aculhirà una jornada consacrada al desvolopament de l’ensenhament de las lengas de França e a l’aplicacion de la lei del 21 de mai de 2021.
L’eveniment èra coorganizat per la Region Occitania Miègjorn-Pirenèus, Òc-Bi, Lo Congrès permanent de la lenga occitana, l’IEO-OPM, lo CREO de l’Acadèmia de Tolosa, las Federacions Calandreta de Miègjorn-Pirenèus e Lengadòc, e la Coordinacion occitana de la Région Occitania Miègjorn-Pirenèus, en partenariat amb lo CREO Lengadòc, lo CREO Aquitània, la FELCO, l’APLEC, Arrels, La Bressola, l’OPLC, l’OPLO, lo CIRDOC-Institut occitan de cultura.
Elegits, expèrts, professionals, responsables associatius e de l’Educacion nacionala escambièron informacions e analisis sus la lei, sa mesa en òbra, la generalizacion de l'ofèrta d’ensenhament a totes los escolans e tanben sul convencionament entre l’Estat, las collectivitats e los operators publics. La reflexion e las proposicions s'apevèron sus de comparasons de la situacion e de las politicas linguïsticas de diferentas lengas.
Aprèp d’unas intervencions sus l’encastre juridic actual determinat per aquesta lei de 2021, foguèt l’ocasion de far un estat dels luòcs e de recampar fòrça proposicions cap als objectius intermediaris e als mejans per poder prepausar l’ensenhament de l’occitan e del catalan a totes los escolans. Amb d'uns 200 participants, aquesta mobilizacion de las bèlas es un signe fòrt al moment que la Region Occitania s’aprèsta a negociar las futuras convencions cap a l’ensenhament de e en occitan e catalan amb l’Educacion nacionala.
- Reportatge ÒcTele :