Lo dijaus 8 d'octobre, lo collectiu Pour Que Vivent Nos Langues enviè un comunicat en sosten a la proposicion novèla de lei a l'iniciativa dels deputats Paul Molac e Peio Dufau, qu'a per mira de garantir l'usatge, la proteccion e la promocion de las lengas regionalas dins la Republica.
Aquel dimars 6 d'octobre, los deputats basc Peio Dufau e breton Paul Molac, respectivament deputats dels Pirenèus Atlantics e de Morbihan, an anonciat aver depausat una proposicion de lei constitucionala (PPL n° 3216) qu'a per mira de garantir l'usatge, la proteccion e la promocion de las lengas regionalas dins la Republica. Prepausan de modificar l'article 2 de la Constitucion qu'afirma que “la langue de la République est le français”.
L'associacion Pour que vivent nos langues, que fedèra de desenats d'associacions de defensa de las lengas ditas “regionalas”, saluda aquela iniciativa e se regaudís que dels parlamentaris se sasisson enfin de la question de l'article 2, aqueste essent sistematicament utilizat pels Prefèctes e dins los arrestats dels tribunals per entravar, per una lectura restrictiva, tota mesura qu’a per tòca d'autrejar mai de visibilitat e de permetre una utilizacion mai granda de nòstras lengas dins la vida publica.
Pour que vivent nos langues se felicita d'autant mai qu'aquela anóncia interven doas setmanas après sa conferéncia de premsa balhada a Villers-Cotterêts, on anonciè son intencion d'interpelar las candidatas e los candidats a l'eleccion presidenciala de 2027 per fin que se posicionen sus la modificacion d'aquel article e sus l'adopcion d'una lei lingüistica.
Pel comunicat present, Pour que vivent nos langues apèla las deputadas e los deputats estacadas a las lengas regionalas, que, per rampèl, son inscrichas dins la Constitucion coma “appartenant au patrimoine de la France” (article 75-1), a cosignar aquela proposicion de lei constitucionala per fin que siá examinada en session e, esperem-o, adoptada per l'Assemblada nacionala. En va de la revitalizacion de nòstras lengas que, coma o soslinha l'Unesco, son totjorn classadas en dangièr de disparicion.