Arron la publicacion deu projècte de lei de finança 2023 deu 12 de deceme passat, qui mèrca ua aumentacion deu budget deu Ministèri de la cultura (correspondent en realitat a ua compensacion de l’inflacion), lo collectiu que denóncia que la sola linha budgetària qui non creish pas que pertòca « l'Accion 03 : Lenga francesa e lengas de França deu Programa 361 – Transmission deus sabers e democratizacion de la cultura ».
De mei, dab la comunicacion hòrta deu Ministèri cap a « ua ambicion hòrta tà la lenga francesa capvath lo monde », lo collectiu que critica aquera politica en pretextar que ne’s poderà miar qu’en « baishar los crèdits afectats dinc adara a las lengas regionaus ».
Plan tocadas dab los reculs istorics recents au ministèri de l’Educacion nacionau, las lengas regionaus que pateishen ara « d’aquera politica d’estofament deu [lor] desvolopament », ce senténcia lo collectiu.
Que bremba tanben lo ròtle qu’a a jogar lo Ministèri dab l’Educacion artistica e culturau (EAC) e lo sector de l’edicion e qu’acaba per constatar la paradòxa de l’estat francés qui defen « la plaça deu francés e lo plurilingüisme capvath lo monde en tot predicar un monolingüisme anacronic suu son territòri ».
Que s’estàn a la disposicion de la Ministra de la cultura entà escambiar au parat d’un rendetz-ve de tribalh.