La conferéncia internacionau de las ressorsas lengatgèras qu’a aprovat un article scientific coredigit enter mantun sòci en lo quadre deu programa deu Poctefa Linguatec : Lo Congrès (Aura Séguier, Michaël Barret e Benaset Dazéas), Elhuyar (Ander Corral, Igor Leturia) e lo CNRS (Philippe Boula de Mareüil e Nicolas Quint).
Prevista deu 11 au 16 de mai a Marselha – ne’s podó pas tiéner pr’amor de las condicions excepcionaus qui traucam – la conferéncia LREC 2020 (Language Resources and Evaluation Conference) qu’ei un eveniment màger pertocant las ressorsas deu lengatge (LR) e l’evaluacion de tecnologias deu lengatge (LT). LREC qu’a l’objectiu de presentar ua vision generau de l’estat de l’art, d'explorar las orientacions navèras en mestior de recèrca e desvolopament e las tendéncias emergentas, d’escambiar informacions sus las LR e las soas aplicacions, las metodologias e utís d’evaluacion, las activitats en cors e previstas, los usatges e besonhs industriaus, las exigéncias requesidas per la societat de l’informacion, tant deu punt de vista politic com tecnologic o organizatiu.
Lo hèit qu’aqueste article e sia estat aprovat que s’amerita d’estar mentavut. L’article retiengut per LREC 2020 que presenta la concepcion d’un sistèma de sintèsi vocau (text-to-speech o TTS) per ua de las varietats màgers de l’occitan, lo gascon, qui’s desvolopè au còr deu projècte Linguatec. Que s’empleguè un TTS neuronau de darrèra generacion entà l’occitan gascon dab un nombre redusit d’òras d’enregistrament, en har compte de la prononciacion deus noms pròpis francés. Que’s desvolopè e que s’evaluè mantun sistèma, uns basats suu tèxte, autes suus fonèmas, e autes qui hèn compte deus enregistraments de mots francés o non.
Los apòrts hèits qu’estón valorats positivament, e qu’esperam atau har progressar un maine de recèrca qui poderé profieitar a l’espandida de totas las lengas minorizadas.
- Retrobar l’article suu site deu Poctefa Linguatec
- Léger l’article (anglés)