Que s’organizè lo 16 de genèr passat un talhèr « toponimia » dab representants de l’IGN e deu Congrès permanent de la lenga occitana. Per rebrembe, lo Congrès que signè dab l’IGN ua convencion, renovelada en 2025, tà l’analisi ortografica, la correccion dels toponimes d’origina occitana e la restitucion en lenga occitana dels toponimes contenguts dins la basa de donadas toponimicas de l’IGN.
Concrètament, que s’i parla de rensenhar las informacions occitanas de la basa BD TOPO, dont lo servici mei conegut ei Géoportail.
Aquera convencion que’s realiza dens l’encastre deu Contracte de plan Estat-Region (CPER) qui permet au Congrès de portar un programa pluriannau (2024-2029) de restauracion de toponimia occitana. Tà aquò har qu’estó recrutada ua toponimista, Isabelle Collomb, qui realizè un inventari de las òbras existentas, institucions/associacions activas e personas ressorsas e tanben ua bibliografia de referéncia (900 referéncias), e qu’a aviat tribalhs de restauracion de formas toponimicas occitanas dens l’encastre d’ua geografia prioritària (dinc adara intercomunalitats en Auda, Ardecha, Cantal, Losera, Òlt, Pirenèus atlantics, Puèi de Doma) : atau qu’estón restitüits deu debut deu programa ençà mei de 15000 toponimes, microtoponimes, idronimes e odonimes sus 162 comunas. Aquestes que seràn integrats en la basa bèra deu Congrès, lo Topòc, qui serà ua basa centralizada on caberan totas las informacions (informacions administrativas, ortografia, etimologia, discussion, hont bibliografica) e qui connectada dab servicis com Géoportail. La reünion que permetó d’en presentar los estandards d’escambi.
Que s’i parlè tanben de l’enjòc de l’odonimia (noms de via) e de la BAL - la Base d’adresse locale (Basa d’adreça locau) - qui ei un fichèr oficiau produsit per las comunas qui recensa totas las adreças deu son territòri, dab la posicion geografica precisa. Qu’ei la referéncia deus servicis publics, deus secors, de la liurason o enqüèra deus operators telecom entà aver ua adreça unica, fisabla e actualizada. La lei Notre que preved d’ara endavant la possibilitat d’integrar las lengas regionaus (ua comuna com Ardizas en Gèrs qu’ac hasó dejà en aliança dab lo Congrès), çò qui plaça la comuna au còr deu tractament e de la difusion de la toponima occitana a Geoportail (qui ei dirèctament connectat a la BAL).
Enfin l’equipa deu Congrès que presentè un projècte de portau de toponimia occitana, qui serà un accès unic taus actors de la toponimia - collectivitats, cercaires, associatius - dab divèrsas ressorsas : basa toponimica topòc, cartografia, bibliografia, notícias e actualitats.