Après quatre ans de trabalh, lo traductor automatic occitan-francés e francés-occitan (varietats gascona e langadociana) del Congrès es enfin en linha !
Se lancèt oficialament lo divendres 14 d'octobre en preséncia dels partenaris financièrs (POCTEFA, Departament dels Pirenèus Atlantics, OPLO) e tecnics, dont la fondacion basca Elhuyar que desvolopèt l'interfàcia e l'API de Revirada. I foguèron presentats d'unes sites d'estructuras qu'an causit d'utilizar Revirada per prepausar una version bilingüa de lors paginas, tradusidas « a la volada ».
Revirada es lo traductor automatic occitan de referéncia del Congrès. L’avem bastit sus la basa del motor liure Apertium e intègra las melhoras ressorsas de la plataforma locongres.org. De desvolopaments innovants permetèron de seleccionar los melhors parelhs de traduccion. Lo traductor conten ara 1 milion de formas occitanas, 500 000 formas francesas, 170 000 parelhs de traduccion, 1 600 règlas de seleccion lexicala...
Atal, se pòt tradusir de tèxtes en copiar-pegar, mas tanben de documents en conservar la mesa en forma o de sites web « a la volada » a partir de l'URL. Se tròban tanben d'aplicacions pels telefonets e pels navigators. Pels desvolopaires, un plug-in e una API permeton d'integrar de traduccions de qualitat dins los sites web e las aplicacions.
Lo traductor cobrís l'ensemble de la diversitat lingüistica infradialectala dins lo sens occitan-francés : Revirada, d'efièit, reconeis mai d'un milion de formas flechidas (mots conjugats e declinats) representativas de la diversitat dels parlars dels parçans gascon e lengadocian. Dins lo sens francés-occitan, los esfòrces portèron sus la produccion d'una lenga modèrna, corerenta e de qualitat. Mantun centenat de règlas de seleccion lexicala e d'algoritmes de pòst-tractament avançats permeton de garantir una lenga mai autentica possibla.
Ara, cadun pòt utilizar l'otís, aqueste es una primièra version que serà enriquesida e melhorada a mesura de las tornas dels utilizators.
Per festejar la publicacion de Revirada, Lo Congrès ofrís a totes l'accès gratuit a las traduccions de documents, sens limita de caractères, pendent un mes (fins al 14 de novembre). Per aquò, basta pas que d'utilizar lo còdi promocional « Revirada2020 ».