Lo 7 de julhet de 2026 a Clarmont d'Auvèrnhe, la Region Auvèrnhe‑Ròse‑Alps, en partenariat ambe l’Institut d'Estudis Occitans-ARA, Calandreta, l’Ostal del Telh, Découvertes occitanes, lo CFPOC Montanhòl e lo Congrès permanent de la lenga occitana, organiza un Rencontre per la lenga e la cultura occitanas, plaçat jos la presidéncia d'onor de Fabrice Pannekoucke, president de Region, e de Laurent Wauquiez, conselhièr especial. La jornada serà dobèrta per Sophie Rotkopf, vici‑presidenta delegada a la cultura e al patrimòni.
Aquel rencontre, que s'inscriu dins la preparacion del tresen plan d'accion regional al benefici de l'occitan e a per tèma Quinas perspectivas per l'occitan suls territòris ? a per mira de mobilizar l'ensemble dels actors locals — comunas, intercomunalitats, departaments, pargues naturals, oficis de torisme, estructuras culturalas — per tal d'afortir lor ròtle dins la difusion e la valorizacion de la lenga occitana.
L’eveniment prevei un primièr temps consacrat al bilanç del plan d'accion regional 2023-2025 (a l'entorn de tres aisses : transmission de la lenga, visibilitat sul territòri, despartiment del patrimòni cultural e lingüistic) amb de testimoniatges d'iniciativas portadas pels territòris amb l'acompanhament de las associacions signatàrias del plan d'accion 2023-2025, seguit d'una intervencion del sociològ Jean-Yves Agard sul tèma L'occitan, factor de desvolopament dels territòris ?. Enfin, de talhièrs tematics permetràn d'evocar las pistas concrètas per que los territòris intègren la lenga e la cultura occitanas coma un factor de desvolopament e d'atractivitat, amb l'ambicion de mobilizar los elegits locals dins la començada del plan d'accion venent.