11 ans après la soa mesa en linha, lo diccionari occitan de referéncia qu’a beròi pèthmudat !
Mercés a un tribalh de longa man de mantuas annadas, aqueth utís de punta que perpausa d’ara enlà un sarròt de ressorsas e de servicis integrats. Que l’avem pensat tà qu’ajan los usatgèrs ua experiéncia enriquida e l’accès a ua lenga mei qualitativa.
Dicodòc que perpausa d’ara enlà traduccions, conjugasons, expressions, sinonimes, tèrmes especializats, toponimes e exemples en un solet utís dab un site dedicat - dicodoc.eu - e ua aplicacion mobila navèra.
Dab 470 000 entradas e 2,2 millions de fòrmas conjugadas, Dicodòc qu'ei lo diccionari occitan mei complet qui sia. Que cobreish las sheis varietats màgers de l'occitan e que l'actualiza regularament l'equipa deu Congrès permanent de la lenga occitana. Gessit deu tribalh de tractament automatic de la lenga, Dicodòc que’vs perpausa ressorsas navèras tà enriquir las vòstas recèrcas dont lo conjugador qui a d’ara enlà ua version en occitan lemosin. Mercés a ua aliança dab editors, Dicodòc qu’intègra uei lo dia un còrpus textuau de 2,2 millions de mots extrèits de 400 òbras de la literatura classica e contemporanèa occitana.
Lo site internet qu’a ua interfàcia unica e de las simplas e qu’ei de bon anar entre las ressorsas. De mei, Dicodòc qu’ei enqüèra mei rapide ! Los utilizators que’n van a sauts entre las ressorsas mercés a ua infrastructura numerica optimizada.
La navèra aplicacion mobila qu'ei teledescargabla a gratis de las botigas Google Play e App Store estant. Lo corrector ortografic e lo clavèr entaus telefonets que'vs guarantiràn tot dia l'usatge d'ua lenga de qualitat.
- Utilizar Dicodòc
- Dossièr de premsa
- Installar l’aplicacion mobila : AppStore / GooglePlay
- Véder los tutoriaus video