Presentar l'occitan lemosin dins sa richesa e sa contemporaneïtat, tau es l'objecte de queu lexic complet, frucha d'un trabalh de recercha menat per Danís Chapduelh, dirigit per lo Congrès permanent de la linga occitana, e aquí editat per Novelum, l'Institut d'Estudis Occitans (IEO) dau departament de Dordonha.
Emb mai de 15 000 entradas francés-occitan e 25 000 dins lo sens occitan-francés, quel obratge vòu aisinar la compreneson e l'aprendissatge d'una linga plan viva enquera, cababla au còp de se recordar lo monde d'ier coma de descriure lo de uei. Queu Lexic lemosin Francés-Occitan / Occitan-Francés ajudará quilhs e quelas que son familiers d'una linga d'òc auvida au breç a ne'n fixar l'escritura, e acompanhará los noveus aprenents dins la descuberta dau vocabulari e de las expressions popularas d'un país ente demòran benleu. Enfin, per tots e totas fará una dubertura curiosa au domeni occitan, a las autras lingas latinas e a las lingas dau monde.