Lo Congrès, l'OPLO e lo Cirdòc-Institut occitan de cultura an fait un sondatge per recensar los besonhs en aplicacions ligadas a la lenga e/o la cultura occitanas.
La comunautat lingüistica occitanofòna pertòca un territòri bèl de quicòm coma 150 000 km². Dins un contèxte de diglossia fòrta, las escasenças de practicar la lenga e d’accedir a la cultura son raras, alara qu’existisson (l’occitan es una de las comunautats lingüisticas mai grandas de França metropolitana). Son pas informadas las gents qu'es possible, per exemple, de parlar la lenga dins tala botiga o tal servici public, que i a de corses o un concèrt a venir près de l'endrech ont se tròban, encara mens que i a de locutors a l’entorn prèstes a discutir. Lo numeric ofrís de novèlas possibilitats per respondre a aqueles besonhs, e d’aquel constat es nascuda l’idèa de prepausar un servici innovant de socializacion lingüistica pel mejan d’una aplicacion comunautària.
L’aplicacion seriá dedicada a un public occitanofòn (mai que mai lo public aprenent) e tanben a un public mai larg interessat per la creacion occitana. Un estudi de factibilitat permetrà de detalhar las foncionalitats màgers e las especificacions tecnicas d’aquela aplicacion.
Portada pel Congrès permanent de la lenga occitana, l’Ofici public de la lenga occitana e lo Cirdòc-Institut occitan de cultura, aquel procediment vòl uèi associar los usatgièrs per respondre çò mai plan possible a lors besonhs : Quals son vòstres usatges numerics ? Qualas foncionalitats vos son de manca a l’ora d’ara dins vòstra practica de la lenga e de la cultura occitanas ? De qu’esperatz coma servicis ?
Vos podètz exprimir en respondent a aquel sondatge, que vos prendrà pas que qualques minutas :
Vos mercejam fòrça per vòstra participacion !