L'aliança deu Congrès Permanent de la lenga occitana que s'alarguè pendent l'Amassada generau deu 23 de mai. En efèit, a aqueth parat la Comuna de Tolosa e lo Conselh generau deus Pirenèus Atlantics que's trobèn aliats deu Congrès.
Los dus navèths sòcis que son collectivitats que mian dejà ua politica tà la lenga occitana. La Comuna de Tolosa qu'adoptè lo 23 de març de 2012 ua carta municipau tà la cultura occitana. Aquesta qu'a per prètzhèit d'aumentar lo nombre de locutors e de socializar la lenga auprès deus tolosans. Lo Conselh generau deus Pirenèus Atlantics qu'ei eth a la punta au nivèu de la politicia lingüistica. Qu'a duas lengas suu son territòri, lo basco e l'occitan, e las accions en favor d'aquestas que s'i multiplican.
Aqueth dinamisme de las alianças qu'ei un testimoniatge de la reconeishença per las collectivitats deu tribalh deu Congrès. L'an passat dejà, Lo Congrès que s'èra atraçat lo sostien deu Conselh generau deus Pirenèus Hauts. Dab aqueras duas adesions mei, lo tribalh deu Congrès que pren ua dimension navèra.
Gilabèrt Mercadièr, President deu Congrès, Bernat Dubarry, encargat de mission tà la lenga occitana au Conselh generau deus Pirenèus Hauts, Jean-Charles Valadier, adjunt au cònsol de la Comuna de Tolosa.