En aquera tempora de vacanças e maugrat lo caumàs, l’equipa technica deu Congrès permanent de la lenga occitana que contunha de s’i har tà perpausar aus usatgèrs servicis e ressorsas navèras, e que ne i a qui vederatz espelir a la rentrada !
Qu’èm a acabar la version navèra deu Dicodòc, qui pensam mei que mei tau public d’Aran e de Catalonha. Mercés a ua aliança dab lo Conselh Generau d’Aran, las edicions Pagès e la contribucion de la comunautat, lo Dicodòc navèth qu’aurà d’ara enlà lo diccionari Castelhan-Aranés (50 000 entradas) de F. Vergés e un lexic catalan-aranés, l’aranés que serà tot parièr integrat au conjugador, aus sinonimes e expressions. Lo public que profeitarà tanben d’ua version catalana de l’interfàcia.
Deu costat deu programa europèu LINGUATEC-IA, a la rentrada que’s harà un entrainament navèth de Votz, la sintèsi vocau occitana, dab votz navèras en lengadocian, gascon, aranés, provençau e lemosin. Dab l'evolucion de las tecnologias, las votz que son de bon integrar, quauquas òras d’enregistrament que permeten de hornir ua votz navèra en ahortir la qualitat de las autas. Aqueste estiu, lo pòle informatic qu’ei a repassar lo còrpus textuau alinhat a la votz enregistrada. Tot parièr que’s tractan las ressorsas tà la reconeishença vocau en aranés, qui serà publicada en fin d’annada. Enfin l’equipa de Revirada, traductor automatic occitan, qu’avança tà l’integracion de l’aranés e l’abonida de la variacion intèrna (gestion deus “trèits” de lenga) e ua reconeishença mei bona de la traduccion a la volada.
Tà çò deu Contracte de Plan Estat-Region, l’equipa deu DGILO (diccionari generau de la lenga occitana) qu’ei a repassar la letra A, dab ua edicion prevista enter lo dusau semèstre de 2026 e lo començament de 2027. Aquesta qu’aurà ua integracion a Dicodòc, mes tanben ua interfàcia de punta dedicada : mercés au format TEI (Text encodadge information), que’s poderà consultar las ressorsas de faiçon precisa, per exemple cercar occuréncias tà tau parlar, unicament en las citacions, filtrar los maines de coneishenças, etc.
Tà la partida toponimia, lo pòle Lenga&Societat qu’avança tà la redaccion deu portau navèth on cabèran lo Topòc navèth (basa toponimica occitana), cartografia, notícias tà las collectivitats e taus toponimistas, etc.
Aquí quauques obradors en cors devath la calorassa, en l’espèra de vs’arretrobar a la rentrada, que’vs desiram a totas e a tots, un bon estiu !