Ua actualitat tostemps cargada entau pòle Lenga & Societat : encontres, traduccions e un site de descobèrta de l’aprentissatge de la lenga occitana aqueste mes !
Que s’i poderà léger en occitan gascon com a cada edicion dens lo Baiona mag a viéner, e tanben tota l’informacion navèra tà çò de Txik Txak en çò de la Comunautat d’aglomeracion país basco.
Que’s parlè tanben de lenga e territòri au parat d’un encontre Interparcs deus PNR (Parcs naturaus regionaus) de la Region Occitània, dab representants de la lenga occitana e de la lenga catalana, entà ahortir la preséncia de senglas lengas au còr deu son patrimòni naturau.
Lo pòle Lenga & Societat qu’estó present a Orlhac lo 7 d’abriu passat a la conferéncia deu Michel Feltin-Palas Pourquoi et comment sauver l'occitan ? entà escambiar sus las politicas lingüisticas a diferentas pagèras : los escambis be n’estón deus rics.
L’associacion Esprit du Sud Lanas que’s hè lo relai de las activitats deu Congrès peu mejan de la soa darrèra letra d’informacion.
Fin finala, costat realizacion : Loecsen, platafòrma d'aprentissatge/descobèrta de lengas en linha qu'a d'ara enlà la soa version en occitan, au demiei de 50 lengas de capvath lo mond sancèr ! Lo pòle Lenga & Societat que s’encarguè de la coordinacion de la traduccion.
Entà acabar, ua novèla de las bonas : ua cèrta regia de transpòrts de las bèras que’ns contactè entà tribalhar sus l’integracion de la sintèsi vocau Votz suu lor hialat... Que ve’n tieneram assabentats, solide.
Estatz-ve connectats !