Ua actualitat plan cuentada entau pòle Lenga & Societat : encontres, traduccions e autas realizacions que son au rendetz-ve !
Au delà de las traduccions de totas entà la comunautat d’aglomeracion País Basco o enqüèra la vila de Baiona, mei d’ua demanda que ns’estón hèitas : noms de sala deu centre d’entrainament de la Seccion paulina, arreproèrs pertocant la natura tau servici educacion a l’environament deu conselh departamentau 64, la rota VéloOccitanie deu Parc naturau regionau (PNR) - Lengadòc haut... Shens parlar d’ua mèrca de vestits o de la region Occitania e ua comuna de Vath d’Aussau qui ns’entercalhèn tà occitanizar la lor comunicacion toristica : un ahar de seguir...
Lo pòle Lenga & Societat qu’a tanben per mission l’assessorat tà las collectivitats dab la traduccion simultanèa :
- jurada d’embaucha tau recrutament deu navèth cargat de mission lenga e cultura occitana gascona a la comunautat d’aglomeracion País Basco,
- intervencions en occitan au parat deu Seminari transnacionau deu programa europèu Lhives SUDOE a Pau aqueste divés 31 de març, tà çò deu Patrimòni culturau immateriau (PCI) e de la cooperacion europèa.
Lo divés 24 de heurèr passat, lo pòle Lenga & Societat que presentè los utís numerics deu Congrès, dab Revirada e lo site navèth deu pòle, a l'amassada generau d'Esprit du Sud 40 qui's tienó au Mont. Lo public qu'èra nombrós e los escambis dab la mairetat deu Mont, o la federacion francesa de corsa landesa enter autas qu'estón deus rics. Aquiu un resumit de las activitats de l’amassada, dab la lor letra d’informacion.
Que’ns vienó visitar tanben lo Peio Dibon-Elissiry, genealogista familiau, qui pòt tanben tribalhar tà çò deu collectatge, de la toponimia, la valorizacion deu patrimòni... en francés, basco e occitan gascon.
Fin finala que podetz arretrobar suu site lengasocietat.eu ua realizacion qui’s hasó tà çò deu Camin vielh enter Biost e lo Bagès en vath d’Aussau.
Estatz-ve connectats !