Bona annada, urosa e granada per vosautres, los vòstres e la nòstra lenga
Baste que l’an novèl
valga mai que non pas lo vièlh….
L’an vièlh 2015, o cal ben dire, es estat òrre, un annus horribilis, al nivèl internacional, nacional e per l’occitan.
Pr’aquò, per la nòstra lenga, èran pas las esperanças que mancavan. Esperàvem, per ne citar sonque tres, la ratificacion promesa de la carta de las lengas minoritàrias, una vertadièra lei enfin e de mejans per la mesa en òbra dels articles en favor de las lengas regionalas ganhats dins la lei de refondacion de l’escòla. Res es pas passat e quitament, per far espelir e engatjar l’Estat dins l’Ofici public de la lenga occitana, volgut per de regions, a calgut la cauma de la fam d’un elegit.
Urosament, ça que la, que sul terren de bonas iniciativas son estadas presas. Per sa part, lo Congrès a pogut enriquir son site, balhar mai d’apleches. Las consultas de son site an crescut encara. Son utilitat, sa legitimitat e sa credibilitat coma organisme de regulacion reconegut son estadas confortadas.
Lo Congrès a ensajat tanben de federar çò que d’un autre latz s’escampilhava e tot còp s’opausava… Perque lo movement occitan, o cal ben dire, s’es pas pro endevengut per menar d’accions e de procediments comuns. Las divergéncias an degalhat tròp d’energia, fach cabussar d’unas iniciativas, rebutat de mond, crescut l’amarum. L’eficacitat per la lenga n’a patit. Cal pas oblidar los objectius essencials, lo denominator comun. Per pensar l’an novèl podèm pas oblidar l’an vièlh !
Ara, l’an novèl comença amb la mesa en plaça de la reforma dels collègis e tanben de las novèlas regions e de l’interregionalitat amb l’Ofici public de la lenga occitana. E la campanha per l’eleccion presidenciala es ben lançada. Es dins aquel contèxte que l’occitanisme deu pensar son accion e trobar tre ara de lòcs, de modalitats de recampament e de debat per definir amassa d’estrategias, de procediments comuns que federen largament e que permetan una accion pus eficaça cap a las institucions.
Pel Congrès, 2016 serà una annada de transicion. Anam melhorar lo site, contunhar de metre en linha de novèlas ressorsas en donant mai de plaça, amb lo trabalh dels conselhièrs lingüistics, als utisses de regulacion de la lenga (aumentacion del dicod’Òc amb novèls diccionaris e foncionalitats, conjugador occitan gascon, vocabularis especializats, modul « punt de lenga », etc.).
Lo desvolopament de la fuèlha de rota pel numeric occitan, se n’avèm los mejans, deuriá menar tanben a de produccions novèlas : traductor automatic, corrector ortografic o encara sintèsi vocala.
Per clavar, teni a mercejar los que d’un biais o d’un autre pòrtan pèira al trabalh del Congrès e plan tornar dire que lo Congrès demòra dubèrt a totes los que vòlon ajudar.
Baste que l’an novèl
Nos faga a totes lo camin mai bèl !
Gilabèrt Mercadièr
President del Congrès permanent de la lenga occitana