En segre de las Rencontras occitanas d’Agen en 2024, la Region Novela Aquitània, lo departament de Dordonha, la vila de Perigüers e l'Ofici public de la lenga occitana s'assòcian per perpausar aquel eveniment socio-professionau que se debanará a Perigüers de l’8 au 10 de decembre venents.
L’idèia es de perpausar un espaci per que totas las e tots los que tenen, dins de las posturas diversas (elegits, agents publics, benevòles e salariats associatius), a defendre la plaça de la lenga occitana e d'assegurar son avenidor, s'encontren, eschamhen e definissan amassa de las perspectivas comunas. Aquelas reflexions serán menadas emb l'apòrt e en s’avisar daus questionaments e de las experiéncias bastidas dins las autras airas de lengas regionalas pertot en França.
Jos la forma de talhiers tematics a l'entorn de l'educacion, de la formacion, de la cultura o de l'entreprenariat, de las personalitats nombrosas confrontarán lors vejaires, lors experiéncias, mas subretot, temptarán de formular, coma los participants, de las pistas per l'avenidor.