Ongan l’Universitat occitana d’estiu (UOE) se torna inventar fàcia a la situacion sanitària mondiala.
Es en efèit a una edicion entièrament numerica, radiofonica e gratuita que la MARPOC e sos partenaris vos convidan.
Del 7 al 10 de julhet, descobrissètz l’ensemble de la programacion d’aquela edicion especiala, aculhida pel primièr còp a Montpelhièr dins los locals de la Rampe-TIO, en dirècte sus las ondas de Ràdio Lenga d’Òc de 11h a 18h : radiolengadoc.com.
E per fin de manténer lo ligam social en despièit de las distàncias fisicas necessàrias al regard de la situacion actuala, rendetz-vos sul compte Facebook de Ràdio Lenga d’Òc per son Miegjornau e sus lo de la Marpoc pels temps de conferéncias e de taulas redondas de la tantossada (15h e 17h) per interagir amb los intervenents pel biais del chat. Esitetz pas a i transmetre las vòstras remarcas e questions, qu’un moderator farà seguir en temps real.
Poiretz retrobar d’intervencions del Congrès permanent de la lenga occitana per la votz de son director Benaset Dazéas lo dijòus 9 de julhet de 15h a 17h, per escambiar a l’entorn de las novetats del numeric en occitan, e de l’innovacion pedagogica.
- Per la difusion ràdio : Ràdio Lenga d'Òc
- Per la difusion vidèo : Marpoc
- Per retrobar tot lo detalh e las informacions practicas d’aquela edicion de 2020 : Occitanica