Coma cada annada, en julhet e en agost, poiretz apréner l'occitan a l'escasença de las escòlas e universitats occitanas d'estiu. I aurà l'UOE a Nimes del 5 al 9 de julhet, la de La Guépia del 7 al 13 de julhet e l'EOE de Vilanuèva d'Òut del 17 au 23 d'agost.
L'UOE de Nimes vos prepausarà d'intervencions sus Mistral, Paul Ricard, Jaurès, Max Roqueta, l'ensenhament, l'istòria, la literatura, la politica lingüistica, la musica... I aurà tanben de talhièrs de lenga lo matin e de talhièrs d'escritura l'après-miègjorn, atal coma d'espectacles en serada. Vos podètz inscriure alprès de la Marpoc.
L'UOE de La Guépia prepausarà ela tanben de corses de lenga, e de talhièrs de traduccion, de provençal, de danças tradicionalas e de cant. Poiretz assistir a de conferéncias, de passejadas, de teatre, un concors de badinadas, de projeccions, de concèrts e de bals. Trobaretz lo programa complet e las informacions sul site de l'UOE de La Guépia.
Enfin a Vilanuèva d'Òut, i aurà de corses normals o intensius dins quatre parlars, de conferéncias, d'espectacles, de visitas en jornada e en serada de contes, de projeccions, de concèrts e pel darrièr ser un bal per la fèsta occitanocatalana. Coma a l'acostumada, l'Escoleta aculhirà los mainatges e l'Escòl'Ados los adolescents. Trobaretz totas las entresenhas sul site de l'EOE.