Après duas annadas de magrèra devuts a las constrentas sanitàrias, ua de las mei granas amassadas hestivas au mond que va har lo son retorn gran.
Los hestaires vienuts de tota la Gasconha e deu País Basco que's van aplegar entà mantuns dias e nueits de hèsta dens la vila au bocau de l'Ador.
Qu'ei après ua improvizacion en basco interpretada per un bertsulari qu'a lòc un moment de viva emocion on mantuns detzenats de milèrs de personas e reprenen mots dens la lenga de Pèir de Lesca, l'autor baionés de la cançon Los Tilholèrs. Un còp hèit aunor a las soas duas culturas regionaus, las claus de la Vila que son puish remetudas aus hestaires.
Ua òda a la vila de Baiona e aus sons hestaires qu'ei declamada en gascon pendent la ceremonia d'obertura de las Hèstas. Lo tèxte qu’estó escriut per Sèrgi Javaloyès en 2004 e qu'ei sustot estat escandit per Jan de Nadau, Richard Dourthe, Jean-Michel Larqué o enqüèra Natasha St-Pier. Que retrobaratz ací la darrèra ceremonia d'obertura, en 2019, on lo cantaire Bruno Sallaberry deu grop Que Quio e s’i hasó beròi (a 48’30) :
Lo Congrès permanent de la lenga occitana que tribalha en collaboracion dab la Comission de las Hèstas de Baiona entà assegurar oficiaument la preséncia occitana pendent la ceremonia (que podetz retrobar ací lo tèxte deu Prosei, la soa traduccion, la soa prononciacion e la lista deus sons lectors successius).
Augan, qu'ei la jornalista baionesa MAYA LAUQUÉ qui declamarà lo tradicionau prosei gascon deu balcon de la Mairetat estant, aqueth dimèrcs 27 de julhet de 2022 a comptar de 21h50. Presentatora passada enter autas a I-Tele, qu'anima tanben divèrsas emissions despuish mantuas annadas sus las cadenas deu grop de France Television. E totun, que guarda un ligam hòrt dab la vila de Baiona, e tà la quita sharnèga, qu'ei dab « aunor e plaser » qui acceptè la proposicion d'escandir lo Prosei gascon.