Quò es emb beucòp de tristessa que vos fam part d'una bien meschanta novela.
Nòstra amija e companha de rota de l'IEO Lemosin, Fabiana Garnerin, nos a quitats subitament... Fabiana aviá junch l'IEO Lemosin en 2015, s'era botada a l'occitan jusc’a passar una tesi sus Joan Ganhaire en 2020, que veniá mas de ne'n far un libre. Elegida au Conselh Municipau de Maismac en Corresa e au PNR Milavachas, implicada dins mai d'unas associacions de la Montanha lemosina, l'i obrava autorn de principes que li tenian a còr : solidaritat, dubertura aus autres e segur valorizacion de la lenga e dau patrimòni locau. A l'IEO Lemosin, era membra dau CA, vicepresidenta, teniá la librariá de temps en temps, fasiá de las animacions d’aquí d’alai – talhier de lenga, lecturas, conferéncias, permenadas –, nos acompanhava a l'Estivada de Rodés... quò era quauqu'un sus qui podiam comptar. N'am pas 'chabat de la trobar a dire.
Lo Congrès presenta sas condolenças aus pròches e aus amics e saluda l'òbra de la passionada, de l'engatjada, de la militanta per sa lenga e cultura.