Intelligéncia artificiau e cooperacion transfronterèra : de cap a ua infrastructura lingüistica intelligenta e accessibla.
Linguatec qu'ei un programa transfronterèr (Occitania, Novèla Aquitània, Aragon, Bascoat) qui a l'objectiu de desvolopar las tecnologias de las lengas entà tres lengas deu Pirenèus - aragonés, basco e occitan. Sostienut peu POCTEFA, que permetó la constitucion d'un hialat transfronterèr qui amassa administracions, institucions, universitats e centres de recèrca, permetent la cooperacion tecnologica enter las lengas entà desvolopar ressorsas navèras e utís lingüistics.
Concrètament que s'i parla per l'occitan de tecnologias taus com la traduccion automatica, la sintèsi vocau (la tota purmèra !) e aplicacions innovantas entau gran public (barra de traduccion automatica e aplicacion de telefonet de traduccion enter las lengas deus Pirenèus, lector de tèxtes occitans integrats a sites internet, etc.).
Après tres ans de tribalh, lo Congrès permanent de la lenga occitana e Elhuyar qu'organizan lo 17 e 18 de junh un Congrès transfronterèr : en preséncia d'institucionaus e deus sòcis de Linguatec, que s'i parlarà deus enjòcs e de las oportunitats de l'espaci pirenenc - un territòri multilingüe per natura - en mestior de tecnologias de las lengas atau com los desvolopaments realizats dens l'encastre de Linguatec.
La jornada deu 17 de junh, de 9h a 15h, que serà dedicada en particular a l'environament occitan, dab tres temps hòrts :
- Duas taulas redondas, qui tractaràn de la cooperacion capvath l'espaci pirenenc e de la mesa en plaça d'ua infrastructura lingüistica transfronterèra.
- La presentacion deus utís desvolopats entà l'occitan dens l'encastre deu programa Linguatec.
- La signatura d'un acòrd de transferiment dab las enterpresas e las institucions qui desiran emplegar aqueths utís.
Que poderatz seguir lo congrès en linha en dirècte mercés a OcTele capvath lo canau Youtube noste :
Ça-vietz tots !