Secretari perpetuau de l'Academia gascona de Baiona e deu Baish-Ador, Amedèu Baris que’ns deishè a l'atge de 92 ans.
L'Academia gascona de Baiona e deu Baish-Ador que vien de pèrder l'un deus sons. Qu'estó pendent mei de quaranta ans un artisan immancable de la promocion de la lenga occitana gascona, dens aquesta institucion locau. Enter autas accions, que contribuí a l'elaboracion deus panèus trilingües hicats quauquas annadas a dens l'aglomeracion baionesa, en collaboracion dab lo Congrès permanent de la lenga occitana.
Animator centrau deu concors literari deus Calams, coordinator de las conferéncias d'Ací Gasconha, qu'èra tanben a còps professor de gascon o corrector intransigent de las dictadas en aquera lenga qui aimava tant.
Amedèu Baris, qu'èra tanben un umor plen de finessa : los sons tanhents ne desbrembaràn pas lo jutjament de Sent Pançard a Anglet, on incarnava lo curat qui, dab compassion mes shens degrèu, acompanhava lo personatge hastiau dinc au suplici dens las eslamas, au cant de la mar.
L'infatigable manejaire de mots
Dab Jean Maisonnave, que vadè òmi de teatre ; dab Pierre Larrodé, jornalista gascon dens las colomnas de Sud-Ouest. E aqueth infatigable manejaire de mots qu'èra tanben òmi de ràdio entà perméter aus sons conciutadans de començar la lor jornada per un trèit d'umor gascon.
Escrivan plen de finessa, que publiquè mantun obratge dont Capvath Las Lanas de Gasconha a las edicions Per Noste, dens lo quau tornava sustot suu son amor entà la corsa landesa.
Lo Congrès que presenta las soas condolenças aus tanhents e amics e que saluda l'òbra deu passionat, de l'engatjat, deu militant entà la soa lenga e cultura.