Cada annada, a l’iniciativa deu pòle Lenga & societat, las hèstas de Baiona que s’obreishen dab un tèxte en occitan gascon, lo Prosei, declamat per ua personalitat. Augan, qu'estó Joan de Nadau qui obrí las festivitats en cantar L'Encantada puish en declamar lo Prosei, òda a la vila de Baiona e aus sons hestaires.
Lo Congrès que tribalha en collaboracion dab la Comission de las Hèstas de Baiona entà assegurar oficiaument la preséncia occitana pendent la ceremonia d’obertura oficiau.
Qu’ei après ua improvisacion en basco interpretada per un bertsulari que’s tien un moment de viva emocion on mantun detzenat de milèrs de personas e reprenen mots dens la lenga de Pierre de Lesca, l’autor baionés de la cançon Los Tilholèrs. Un còp hèit aunor a las soas duas culturas regionaus, las claus de la Vila que son remetudas adarron aus hestaires.
Lo tèxte deu Prosei qu’estó escriut per Sèrgi Javaloyès en 2004 e qu’estó declamat enter autes per Jan de Nadau, Richard Dourthe, Jean-Michel Larqué o enqüèra Natasha St-Pier.
- Que podetz tornar espiar l'obertura de las Hèstas de Baiona 2025 ací
- Tà’n saber mei suu Prosei e las edicions passadas