Organizadas a Vilafranca de Roergue los 25 e 26 d’octobre, las Carrièras occitanas son un eveniment que vòl reviscolar las manifestacions bèlas per la lenga e la cultura occitanas, com Anem Òc que aguèt quate edicions, a Besièrs en 2007, a Carcassona en 2009, a Tolosa en 2012 (amb 25 000 personas per las carrièras mondinas) e la darrièra a Montpelhièr en 2015.
Es vertat que lo movement occitanista se tròba de manca aqueles espacis d’encontres e de reivendicacions, e se podèm regaudir qu’aquela edicion siá portada per un collectiu jove qui dins son manifèst defen « la diversitat culturala, e una lenga per totes que nos permet de créisser amassa dins una societat dubèrta ».
Pel contengut, an previst manifestacions, discutidas, cantadas, vilatjòts dels diferents païses occitans, passacarrièras e concèrts (son anonciats Cocanha, KxC). Los organizators vòlon tanben tornar bastir simbolicament l’ostal de Joan Petit, que patiguèt del castigament de la revòlta dels crocants pel Rei de França al sègle XVIIen.
Vaqui un polit programa, alavetz los 25 e 26 d’octobre, totes e totas anem a Vilafranca !
- Video de presentacion
- Site internet
- Se pòt sosténer financièrament Carrièras occitanas mercés a una canhòta