Qu’èra ua promessa deu maire de Lescar, Christian Laine, qui ei d’ara enlà complida : la senhaletica de la ciutat que’s declinarà en duas lengas : francés e biarnés.
Lo tribalh de cèrcas e d’arrevirada qu’estó realizat peu Maurici Romiu, istorian entenut de la toponimia de Lescar.
Qu’ei lavetz sus un hons color de sable (jaune/òcra) que los panèus navèths indicant los noms de carrèra e seràn installats en la ciutat renovada. Cadun que presentarà ua explicacion bilingua de l’origina o de la particularitat de la carrèra correspondenta.
Per Christian Laine, « aqueste agís qu’ei un biais de har víver l’istòria de la vila e la cultura vernaculara deu territòri. » Qu’ei la medisha volontat qui’s muishè entà hicar en plaça los navèths bancs au pè deus embarris ondrats de la crotz occitana e los emblèmas de la vicomtat de Biarn.