Creacion d'ua basa lexicau monolingua de l'occitan

Basa lexicala

Lo Congrès permanent de la lenga occitana e lo laboratòri CLLE-ERSS (CNRS/Universitat Tolosa-Joan Jaurès) qu'an aviat ua aliança entà la creacion d'un lexic obèrt de las formas flechidas de l'occitan (Loflòc).

Que hèn aquesta iniciativa dens l'encastre de Restaure (RESsorsas informatizadas e Tractament Automatic tà las lengas REgionaus), un projècte ANR (Agéncia nacionau de recèrca) associant CLLE-ERSS (universitat de Tolosa), LESCALP (universitat d'Amiens) e LILPA (universitat d'Estrasbourg) arron lo desvolopament de las ressorsas informaticas e deus utís de tractament automatic tà tres lengas de França : alsacian, picard e occitan.

Parièr au Morphalou tau francés o au Lexic Obert Flexionat de Català, Loflòc que serà un lexic de las formas flechidas d'un lèma, qu'ei a díser ua basa lexicau monolingua qui compren ua lista de mots occitans dab la categoria gramaticau (tipe, genre, nombre, etc.), las formas flechidas (feminin, plurau, conjugason, etc.) e la varietat.

Loflòc que hè partida deus desvolopaments prioritaris de la huelha de rota entau desvolopament numeric de l'occitan e qu'ei ua ressorsa indispensabla tà l'anotacion deus còrpus textuaus e la creacion d'aplicacions numericas taus com la sasida predictiva e la correccion ortografica.